పశ్చిమ బెంగాల్‌, కేరళలో జరగనున్న అసెంబ్లీ ఎన్నికల్లో తాను ప్రచారం చేసే అవకాశాలు లేవని జేఎన్‌యూ విద్యార్థి సంఘ నాయకుడు కన్నయ్య కుమార్‌ సూచన ప్రాయంగా చెప్పారు. 'ప్రధాన స్రవంతి రాజకీయాల్లోకి రావాలని నేను అనుకోవడంలేదు. నేను ఒక విద్యార్థిని. నేను నా పీహెచ్‌డీ పూర్తి చేసిన తర్వాత ఉపాధ్యాయుడిని కావాలన్నది నా కోరిక. అయితే, అప్పుడు కూడా నా క్రియాశీలత కొనసాగుతుంది' అని కన్నయ్య పేర్కొన్నారు. 

అలహాబాద్‌ విశ్వవిద్యాలయం విద్యార్థి సంఘం అధ్యక్షురాలు రిచాసింగ్‌ విశ్వవిద్యాలయ అధికారుల అణచివేత ధోరణులపై ధ్వజమెత్తారు. రిచాసింగ్‌ ఈ వర్సిటీలో అధ్యక్ష పదవికి ఎన్నికైన తొలి మహిళ. ఏబీవీపీ ప్రత్యర్థి రజ్‌నీశ్‌ కుమార్‌ సింగ్‌ను ఓడించి రిచాసింగ్‌ అధ్యక్ష పదవిని చేపట్టారు. విశ్వవిద్యాలయంలో జరిగే కార్యకలాపాలన్నింటిలో ఆమె ముందున్నారు. తాను విశ్వవిద్యాలయ అధికారుల తప్పుడు నిర్ణయాలకు, హిందూత్వ శక్తుల ఆగడాలకు అడ్డు నిలవడం వల్లనే తనపై పలు రూపాల్లో దాడి చేస్తున్నారని రిచా అన్నారు. పార్లమెంటులో రిచా వివాదం చర్చకు రానున్న నేపధ్యంలో కేంద్రప్రభుత్వం దిక్కు తోచని పరిస్తితులో పడింది..

పశ్చిమ బెంగాల్‌లో జరగనున్న అసెంబ్లీ ఎన్నికలలో పోటీ చేసే అభ్యర్ధుల జాబితాను సోమవారం సిపిఐ(ఎం) విడుదల చేసింది. మొత్తం 294 స్థానాలకు గాను 116 మంది అభ్యర్ధులతో తొలి జాబితాను లెఫ్ట్‌ ఫ్రంట్‌ చైర్మన్‌ బిమన్‌ బసు ఇక్కడ మీడియా గోష్టిలో విడుదల చేశారు. వీరిలో 16 మంది మహిళలు, మైనార్టీ కమ్యూనిటికి చెందిన వారు 25 మంది ఉన్నారు. కాంగ్రెస్‌తో వేదిక పంచుకునే ప్రసక్తే లేదని ఒక ప్రశ్నకు సమాధానంగా ఆయన చెప్పారు.