ఏబీవీపీ జేఎన్యూ నేత‌లు రాజీనామా బాట ప‌ట్టారు. తాజా వివాదంలో ఆర్ఎస్ఎస్, ఏబీవీపీ విధానాల‌తో విబేధించిన ముగ్గురు కీల‌క నేత‌లు త‌మ రాజీనామాలు స‌మ‌ర్పించారు. ఏబీవీపీ స‌హాయ కార్య‌ద‌ర్శి ప్ర‌దీప్ నార్వాల్, క్యాంప‌స్ లోని ఓ యూనిట్ కి ప్రెసిడెంగా ఉన్న రాహుల్ యాద‌వ్, కార్య‌ద‌ర్శి అకింత్ హాన్స్ లు త‌మ ప‌ద‌వుల‌తో పాటు ఏబీవీపీ కి రాజీనామా చేస్తున్న‌ట్టు ప్ర‌క‌టించారు.

దేశంలో మొండిబకాయిలపై సుప్రీంకోర్టు దృష్టి సారించింది. దేశవ్యాప్తంగా వివిధ బ్యాంకులకు, ఆర్ధిక సంస్థలకు 500 కోట్లకు పైగా బాకీ పడ్డవారి జాబితాను తమకు పంపించాలని సుప్రీంకోర్టు రిజర్వ్ బ్యాంక్‌ ఆఫ్ ఇండియాకు కోరింది. 6 వారాల గడువు విధించింది. వివరాలతో పాటు అఫిడవిట్‌ను కూడా పంపించాలని సూచించింది. అదే విధంగా గత ఐదేళ్లలో మాఫీ చేయబడిన భారీ మొత్తాలకు సంబంధించిన వివరాలను కూడా సుప్రీంకోర్టు కోరింది. ఈ వివరాలను సీల్డ్ కవర్‌లో తమకు అందించాలని సుప్రీం ఆర్‌బీఐని కోరింది. 

బీహార్‌లో రాష్ట్రపతి పాలన విధించాలని లోక్‌ జన శక్తి (ఎల్‌జేపీ) డిమాండ్‌ చేసింది. రాష్ట్రంలో శాంతి భద్రతల పరిస్థితి క్షీణించిందని పేర్కొంటూ నితీష్‌ కుమార్‌ ప్రభుత్వంపై మండిపడింది. ఇదే విషయమై గవర్నర్‌ రామ్‌ నాథ్‌ కోవింద్‌ను ఎన్డీయే ప్రతినిధి బృందం కలిసిన కొద్ది గంటల వ్యవధిలోనే ఎల్‌జేపీ రాష్ట్రపతి పాలనకై డిమాండ్‌ చేయడం గమనార్హం. బీజేపీ నాయకుడు విశ్వేశ్వర్‌ ఓఝా హత్యపై సీబీఐ దర్యాప్తు జరిపించాలని కూడా రామ్‌ విలాస్‌ పాశ్వాన్‌ నేతృత్వంలోని ఎల్‌జేపీ డిమాండ్‌ చేసింది.

జెఎన్‌యులో నిరసనల హోరెత్తాయి. గత మూడు రోజులుగా నిరసనలతో క్యాంపస్‌ అట్టుడుకుతోంది. విద్యార్థి నేతల అక్రమ అరెస్టులకు నిరసనగా ఉద్యమం ఉధృత రూపం దాల్చింది. ప్రభుత్వ నిరంకుశత్వ, రాజ్యాంగేతర చర్యలకు వ్యతిరేకంగా వేలాది మంది విద్యార్థులు రోడ్డెక్కారు. వీరికి ప్రొఫెసర్లు సంఘీభావం ప్రకటించారు. జాతీయత గురించి మాట్లాడే వాళ్ళు అందులో భాగమైన రాజ్యాంగం గురించి మరచిపోయారని ద్వజమెత్తారు. అరెస్టు చేసిన విద్యార్థి నాయకులను భేషరతుగా విడుదల చేయాలని, అలాగే హిందూత్వ శక్తుల నుంచి యూనివర్శిటీని కాపాడాలని కోరుతూ విద్యార్థులు వర్శిటీ బంద్‌కు పిలుపునిచ్చారు. అందులో భాగంగానే సోమవారం వర్శిటీ బంద్‌ సంపూర్ణంగా జరిగింది.