మోడీని స్వయంగా కలిసి రాష్ట్రానికి న్యాయం చేయాలని కోరినా ఫలితం లేదని ముఖ్యమంత్రి చంద్రబాబు ఆవేదన వెలిబుచ్చారు. విజయవాడలో మంగళవారం జరిగిన టీడీపీ విస్తృతస్థాయి సమావేశంలో కేంద్రంపై తన అసంతృప్తిని ఆయన బహిరంగంగా వెల్లడించారు. ప్రత్యేక హాదా, రాజధాని నిర్మాణానికి నిధులు, రాయలసీమ, ఉత్తరాంధ్రలోని వెనుకబడిన జిల్లాలకు ఆర్థిక సాయం, పారిశ్రామికాభివృద్ధికి ఊతం, పోలవరానికి నిధులు, విశాఖకు రైల్వే జోన్‌ వంటి అంశాల్లో కూడా బడ్జెట్‌లో రాష్ట్రానికి న్యాయం జరగలేదన్నారు.

న్యూఢిల్లీ : ఇపిఎఫ్‌ వినియోగదారులు విత్‌డ్రా చేసే మొత్తాలపై, యజమానులు చెల్లించే వాటాలపై పన్ను విధించాలన్న ప్రతిపాదనను బిఎంఎస్‌తో సహా కేంద్ర కార్మిక సంఘాలన్నీ తీవ్రంగా వ్యతిరేకించాయి. ఇది కార్మిక వ్యతిరేక చర్య అని, ద్వంద్వ పన్నుల విధానానికి ఇదొక చక్కని ఉదాహరణ అని పేర్కొన్నాయి. ఇది కార్మికులపై దాడి చేయడం తప్ప మరొకటి కాదని ఎఐటియుసి ప్రధాన కార్యదర్శి గురుదాస్‌ దాస్‌గుప్తా విమర్శించారు. ఇది పొదుపు చర్యల వ్యతిరేక ప్రతిపాదన అని పేర్కొన్నారు.

న్యూఢిల్లీ : జెఎన్‌యు విద్యార్ధి సంఘ అధ్యక్షుడు కన్నయ్య కుమార్‌, మరో ఇద్దరిపై దేశద్రోహ కేసును నిరసిస్తూ విద్యార్ధులు బుధవారం పార్లమెంట్‌కు ప్రదర్శన నిర్వహించనున్నారు. ఈ కేసులో అరెస్టయి జైల్లో వున్న మిగిలినవారిని విడుదల చేయాలని డిమాండ్‌ చేస్తున్నారు